Thursday, May 31, 2012

墨西哥牛油果醬 Guacamole

加州好多墨西哥人,所以墨西哥餐廳周圍都有,去到食墨西哥嘢,都會有兩三個醬俾你用嚟沾粟米片食,其中一個就係綠色用牛油果做嘅Guacamole。牛油果熱量好高,減肥就真係唔好多食,其實食落都知,牛油果味濃質厚,我自己冇可能食得晒一個,小朋友食都仲OK,發育時間有運動就唔駛驚,但年紀大就要小心啦。




雜錦沙律配自製芒果乳酪醬汁 Mixed Salad with Homemade Mango Yogurt Sauce

李生要求食沙律做晚餐,我咁啱有一大包做沙律生菜,原本想就咁加個沙律汁就算,但望落好齋,應該提唔起李生食慾,一個大男人又點食得飽?所以就睇下雪櫃仲有咩可以加入去,哈哈,好彩我個雪櫃通常都有七成滿,都有不少材料係百搭,睇下個沙律有D咩。


芒果乳酪醬汁 Mango Yogurt Sauce

原本切咗一個大芒果準備整甜品,但豬扒妹見到話要食,佢食唔晒一個,於是有半個芒果肉淨低,唔多夠整原先想整果樣,又唔想嘥咗呢半個芒果,空口食我又嫌熟咗D,今晚整沙律做午餐,所以就靈機一觸,整咗呢個芒果乳酪醬汁,所需材料不多又易整。

材料:芒果   半個
低脂乳酪 1杯乾
時蘿   3/4茶匙(Dill)



Wednesday, May 30, 2012

怪俠一枝梅(有故事大綱)

當人人都在談步步驚心,陶醉在四爺八爺對若曦的深情中,李生李太正在追看另一部中國大陸電視劇怪俠一枝梅,當中的女主角就是步步驚心的若曦劉詩詩,在怪俠一枝梅中的燕三娘性格冷傲、獨來獨往,碍於面子和不肯認輸,她被怪人離歌笑引來上當,不情不願的幫上忙,之後被離歌笑深深吸引而生情愫。

怪俠一枝梅跟傳統的怪俠一枝梅故事不同,這個是四人聚首的怪俠一枝梅組合,幫助窮苦弱勢。





學期終獎項 A Catastrophe Award

今天在Yahoo網看到一則報導有關一個8歲女孩在學校收到的一個年終獎項,報導中形容這是一個悲慘的獎項(A Catastrophe Award),就如一個災難降臨。這究竟是一個甚麼獎項?




親密式育兒理念 Attachment Parenting

親密式育兒理念原文是Attachement Parenting,中文似乎沒有一個較貼切的譯法。昨日在FB見到有朋友分享5月其中一期時代周刊面,應該是母親節前出版的,封面照片是一個年輕母親和她的三歲小孩,照片中小孩站在小櫈上,母親則站在旁邊擁著孩子哺乳。




Tuesday, May 29, 2012

讀後感:Daddy Long Legs

Daddy Long Legs這本書和我很有淵源,是我中六時第一本自選讀物,是英文老師為我選的,她建議我看,說是很有趣的一本書,當年我應該沒有把書看完,只看了一半不到,已不記得是否要交閱讀報告了。畢業後有一次逛書店看到這一本書,突然很有衝動想看完,彌補當年沒有把書看完的遺憾。可能人大了,又開始有少女情懷,這本書我是一股作氣看完一次又一次,最後連看三次才放下,因為故事真的很有趣,主角很可愛,中間的心理成長和對愛情、前程、自我肯定都有一定的描述,但又不流於說教,主角對資助她的長腿叔叔由敬到愛都是那樣自然。書中除了文字幽默之外,書中有主角畫的有趣插畫,對長腿叔叔講述自己於學校的生活,既生動又突顯主角的直率個性。



青醬肉豆磨菇 String bean & button mushrooms with Pesto Sauce

之前整咗個青醬,即係pesto sauce,唔好講少,真係可以放好耐架,就咁放喺雪櫃,閒閒地可以一兩個星期都冇問題,之前講過pesto sauce唔只可以用嚟煮意粉,仲可以配沙律同菜蔬,咁啱有肉豆同磨菇,味道都幾夾架。




Monday, May 28, 2012

兩款炒麵之2:豉油皇炒麵 Stir-Fried Noodles with Soy Sauce

因為對仔女都揀食,所以另外整多咗一個版本,主要係麵,料比較少,而且炒完都唔多覺。



兩款炒麵之1:雜錦炒麵 Stir-Fried Noodles with Mixed Veggies

李太細個時候媽媽會耐不耐整一餐炒粉麵加煲粥,通常都係就咁芽菜肉絲炒麵炒粉,粥就多數係豬骨粥或醎瘦肉粥,食時加生菜絲喺碗底,將滾粥淋上,媽媽話清熱氣。而家豬扒妹同哥哥就食李太煮嘅炒麵,不過佢地唔多食肉,有肉嘅總會揀番出嚟,我今次就整咗一款多料雜錦炒麵同一款豉油皇炒麵,先講雜錦炒麵。




Friday, May 25, 2012

IKEA早餐

IKEA係一間瑞典公司,業務遍全球,以前喺香港,李太好鍾意去逛,因為樣樣都係簡單得嚟好靚,最鍾意呢隻簡約的幸福,曾幾何時有朋友兩公婆都係IKEA迷,新居就佈置到好似一個IKEA示範單位咁。美國呢邊都有IKEA,但定位同香港好唔同,呢邊IKEA = CHEAP,一般美國人覺得去IKEA係因為平,但唔等同好,試過同老公講去IKEA買小童床,因為又幾靚又平,橫豎小童床都係瞓得三兩年,唔駛買咁貴,老公都話好,但當佢問有小朋友嘅朋友,個個異口同聲話老公cheap,果D床點可以俾小朋友瞓,我心諗唔通個小朋友可以瞓爛張床咩,只要木質夠實,設計安全,就算瞓兩三年爛都OK,個仔到時都要換床啦,最後我地都係冇買到IKEA嘅小童床,豬扒妹同哥哥兩張兒童床都係二手,姑仔俾我地嘅,都大大話話瞓咗好幾年,咩都抵晒。

香港IKEA讀易KEY牙,美國讀艾KEY牙,初初真係唔多慣,呢度好多人去IKEA唔一定係買嘢,而係去食嘢,有咩咁好食?有架,最正係個瑞士肉丸加lingonberry醬同肉汁,次次同我細佬去都要食,而家一碟15粒要差不多$5,試過去食兒童餐好抵,幾蚊有個combo,有通粉或雞柳加果汁同生果。早餐選擇都唔少,今次我地係去咗Palo Alto果間食早餐,因為李生要買過一個laundry bag,呢個款用咗七八年,換第三個,都算係好耐用。



Monday, May 21, 2012

簡單粟米有機菜沙律

因為仲有ranch dressing淨未用完,係呀,就係上次整果D啦,包好放雪櫃都可以用到好耐架。今次係見到有有機菜減價,買咗一大盒,不過,其實都係夠二人份,如果唔係減到好平都唔買,呢種有機雜菜好好食,最緊要新鮮有益,加埋新鮮粟米就一流。



Friday, May 18, 2012

第132款:荷蘭鬢辮變化款 Dutch Braid Variation

法國辮荷蘭辮已經係豬扒妹成日梳嘅髮型基礎,有時都手痕諗下有咩變化,有時係心中有個初稿諗定點紥,有時係拎到頭髮上手,紥下紥下有靈感,呢個係後者,大前提係將會遮面嘅頭髮紥晒上去唔篤眼。



Wednesday, May 16, 2012

雜菜沙律加自家製醬汁

雜菜沙律加自家製醬汁雜菜沙律其實變化無窮,基本食材配合不同醬汁就會有不同食法,呢一個係李太因應雪櫃有嘅物料而做嘅,全部都係新鮮有營養而又經濟嘅配合。


材料:
生菜 1棵
西芹 3大瓣
蕃茄 兩個
青瓜 1大條
士多啤梨 適量

做法:
1)生菜洗淨瀝乾,切或撕成細塊。
2)蕃茄切片,大個蕃茄就再每片切半。
3)西芹洗淨去衣橫切成細塊,青瓜削去部份皮,切成圓片。
4)士多啤梨洗淨去蒂,留半粒做裝飾,其餘切四份一撈入材料中。
5)所有材料務必瀝乾水,放於大碗中,加入醬汁拌勻。





醬汁用自家製Ranch Dressing,做法可按此或點擊以下連結。
http://blog.yahoo.com/_HHPBQ7Z6ZTWGDUBKOMCXMHPPOU/articles/585166

小貼士:
1)呢類沙律雜菜必須瀝乾,因為醬汁較為稀釋,如果菜蔬有水,雪完一夜就會水淋淋,睇見都唔開胃,食落又唔多好食。
2)除咗士多啤梨,可以加入其他時令生果,例如藍苺、菠蘿、蘋果都配搭得到。


香茜炆腩肉

其實豬腩肉近呢一年我都成日炆,因為李生同李太爸都好鍾意食。今次呢塊豬肉係之前李太想焗燒肉買嘅,但因為個神經焗爐,今次燒肉又失敗,個爐成日自動降溫,只要低過400度就一定唔著,去到400度都冇用,一陣又自己熄,所以呢塊肉焗咗成個鐘都唔成功,一D都唔似焗咗咁耐,真係好心淡,但咁大塊點都唔好嘥,於是就諗咗用嚟炆,由於塊肉已經之前醃過煮過,我今次用少好多調味,怕塊肉出嚟太醎,以下所寫嘅調味份量係正常煮要加嘅。



自家製醬汁:Pesto Sauce

Pesto Sauce最多應用於意粉食譜上,係眾多西式醬汁中最健康嘅,卡路里較其他受歡迎嘅Casear Dressing、Thousand Island或Ranch Dressing低,李太陀豬扒妹時因為有妊娠糖尿,有兩三個月時間要控制飲食,營養師幫李太訂定一個少糖食譜,當時一日六餐多食少量,加上選擇合適食材,好快血糖就受控制,當中一個大發現就係Pesto Sauce,所以於控制飲食時都可以大快朶頤,食其意粉通心麵。不過Pesto Sauce都幾貴,一小樽賣七八塊美金,煮到一餐幾個人份量咁大把,於是李太就搵整Pesto Sauce嘅方法,原來不難整,而且可以按口味變化,符合我鍾意多嘗試嘅原則。



自家製醬汁Ranch Dressing

呢個醬汁其實出面都有得賣,現成一樽樽嘅Ranch Dressing,好多人都覺得自己整好難好麻煩,而且一樽要幾錢啫?又要洗又要切,搞一輪得果少少醬汁,但烹飪就係咁,出面買得到,自己都會整得到,睇下有幾多工序同成本。買現成嘅未必完全合口胃,買一枝返嚟有排食,如果唔鍾意都要逼於無奈食晒至可以試另一隻,自己整份量可以控制到食一兩次,咁可以做下實驗不同配搭,另外自己整冇防腐劑,又可以清楚加咗咩材料入去,對於有食物敏感嘅人非常重要。



Monday, May 14, 2012

母親節隨想

李太既為人女亦已為人母,對於母親節的感覺變得複雜,儘管母親大人說沒有所謂,不一定要慶祝,但除非真的有要事,否則還是不敢輕言忘記,天下母親都一樣,都想子女記得自己,如果子女平日已經很忙,母親節就變得是不能推卻的日子,如果當日都不能相陪,真有點說不過去了。

李太有時都會同李太爸媽去飲茶食飯,李太媽怕人逼,所以當李生說不想正日出去吃飯,李太媽可是非常贊成的。李太奶奶則有點不同,她是個注重面子注重禮節的人,試過有一年聖誕節李生李太買了一份廚所用品禮物給她,她一時忘了(因為一早拆開了試用),居然追著李生問為何李生沒有給她聖誕禮物,李生都無言,唯有拉李太到一邊,湊足夠現金放進利是封中給奶奶,之後奶奶發現自己擺了烏龍,千萬個尷尬,但李生李太清楚奶奶是個現實的人,看錢重過親情,記得籌辦婚禮之時,奶奶叫李太返到香港不必辦婚宴,銀紙緊要過面子,有錢大過天,李太媽老實不客氣問她:「如果是你女兒出嫁,可會由得她寒酸地跟人走,不通知任何親戚朋友?我女兒以前在香港人緣不錯,有不少朋友,何況我們在香港還有親戚世交?那為何在美國擺酒要請60圍,那不是錢嗎?」奶奶當下語塞,李生之後叫奶奶不要多事,不過奶奶還是打電話加當面跟我說了幾次,我也不客氣的說婚宴是一定會辦的,我朋友太多,要每一個吃一餐飯我沒時間,一個婚宴花費比分開一百次吃飯化算,而且李太香港的親朋會做賀禮,真的要掏荷包的錢不會太多。

Thursday, May 10, 2012

又到暑假!!!! Here comes the Summer Vacation!

不是嘛?!5月就講暑假?!


沒錯,沒有騙你,這兒5月尾開始放暑假,一直到8月尾再復課,今年足有10個星期,往年都只是8個星期,今年不知何故,暑假加長到10個星期,來年學期春假和寒假就由兩個星期縮減至一星期,這一下真打亂不少家庭陣腳,李生李太是第一年經歷暑假,之前preschool都沒有這樣長的暑假,當時有聽過朋友要為子女找Summer Camp,但始終未身歷其中,感受不到是那一回事。早在二三月就看到不少家長雜誌或電郵通訊提及有關夏令營,更有Summer Camp Fair集中不同夏令營主辦機構,讓家長去報名,一般去到三月就如火如荼,四月還未決定就已算遲,去到五月你就要自求多褔了,因為口碑較好收費又便宜的都已經額滿。


為小朋友做菜11之甘荀杯蛋糕Encore Carrot Cupcakes


再整杯蛋糕帶去仔仔學校旅行,今次整嘅係正常size,唔係上次生日會嘅迷你版,用嘅材料一樣,只係整得大個D,焗嘅時候又要耐D咁解。





Monday, May 7, 2012

為小朋友做菜之10:焗肉丸兩味

因為仔仔學校去周年旅行,所以我特別整咗幾樣嘢帶去,其中一款(兩款)就係焗肉丸,平常仔仔唔食肉,但會食肉丸,相信係finger food嘅關係,由細到大佢都鍾意用手拿食物,我估係因為觸感方面,佢要觸摸去感覺,如果唔係D咩場合,我都由得佢,去旅行只要洗乾淨對手,而食物唔係會食到一手油,用手拿都可以接受嘅。初初諗住就咁整普通肉丸就算,但睇下舊肉咁dry,於是又加咗好多不同菜蔬,況且到時會分俾其他小朋友,有菜會健康D,搓搓吓又諗,如果香口D,小朋友會鍾意多D,但我唔想開大鑊油炸,於是就加咗麵包糠用芝士焗多一款啦。



第131款:法式孖辮馬尾French braids ponytail

其實呢款係無心插柳,幫豬扒妹梳辮有時係靈感所致,今次都係,因為豬扒妹對馬尾情有獨鍾,好多時都會叫我紥馬尾,但而家返學佢都仲會有午睡時間,紥馬尾好唔方便,而且紥咗等於冇紥,佢瞓覺一定會自己拆咗條辮,所以通常都會係周末至會幫佢紥馬尾。




Saturday, May 5, 2012

出席葬禮之二三事

首先聲明,小女子對先人殯葬絕無不敬,只是近年出席了很多個葬禮,看到不少人情同處事手法之不同,昨今兩日出席兩個不同殯葬禮式,有感而發吧了。

這些年有很多長輩先後離世,我兩夫婦出席的殯禮都較以前多,李生在4月已經有3個長輩仙遊,一個是他的太極氣功師傅,享年只有六十多,看外貌只像五十幾,但原來他只少心臟有先天問題,4月中因心臟病去世。另外兩位長輩分別為李生姑媽和舅婆,兩人去世日子更是只隔一天,在同一天出殯,更巧合的是下葬於同一個墓園,李生李太就走兩場,送兩個先人最後一程。

Thursday, May 3, 2012

素炒河粉 Stir-fried Ho Fun with Vegetables

因為李生覺得我之前炒嘅河粉好好食,但佢唔係好鍾意個牛肉,加上仔仔唔多食肉,於是李生提意用素菜炒河粉,不過今次李生好狼,居然要買兩包粉炒,上次一包都一餐食唔晒,今次足足有四大個午餐盒。原本諗住買白菜仔同炒,但昨日去到超市見到白菜仔唔多靚,所以冇買到,只係用屋企有嘅西芹芽菜同洋蔥炒就算啦。



乾炒牛河 Stir-fried Ho Fun wtih Beef

乾炒牛河係李生至愛,佢成日去餐館都會叫呢個,不過出面餐館一般炒得好油,無他嘅,餐館唔係用易潔鑊,炒鑊果個唔會想炒完洗一大餐,於是要唔黏鑊就會加好多油炒,有時食唔駛拎番屋企,第二日帶飯,入微波爐叮完之後就成個碗底都係油,以前自己初初炒唔係斷晒就係痴晒鑊,而家唔同啦,我用好少油之餘,河炒又唔斷又唔會糊晒,心理上係健康過出面食。